[ad_1]

एजेन्सी – युरोपेली च्याम्पियनसिपमा सनसनीपुर्ण प्रदर्शन गर्दै सेमिफाइनलसम्मको यात्रा तय गरेको डेनमार्कले फिफा विश्वकप कतार २०२२ को युरोपेली छनोटमा लगातार छैटौ जित दर्ता गरेको छ ।

घरेलु मैदानमा डेनमार्कले इजरायलमाथि ५–० को एकतर्फी जित निकाल्दै छनोटमा लगातार छैटौ जित निकालेको हो । तेलिया पार्केन कोपेनहेगनमा डेनमार्कको फराकिलो जितमा युस्सुफ पौल्सेन, सिमोन कायर, एन्ड्रिस स्कभ ओल्सेन, थोमस डिलाने र एन्ड्रिएस कोर्नेलिअसले समान एक गोल गरे । पहिलो हाफमा तीन तथा दोस्रो हाफमा दुई गोल सम्भव भएको थियो ।

यही समूह ‘एफ’ को अर्काे खेलमा अष्ट्रियाले स्कटल्यान्डसँग १–० को हार बेहोर्दा फारोइ आइल्यान्डले पहिलो जित दर्ता गर्दा मोल्दोभालाई २–१ ले पराजित गरेको छ ।

यो नतिजापछि डेनमार्क ६ खेलबाट १८ अंक जोडेर शीर्षस्थानमा रहँदा स्कटल्यान्ड ११ अंक जोडेर दोस्रो स्थानमा उक्लिएको छ । इजरायल १० अंक जोडेर तेस्रो स्थानमा रहँदा अष्ट्रिया ७ अंक जोडेर चौथोमा यथावत छ । फारोइ आइल्यान्डको ४ तथा मोल्दोभाको १ अंक छ ।

यस्तै समूह ‘एच’ को खेलमा क्रोएसियाले स्लोभेनियालाई ३–० ले पराजित गरेको छ । क्रोएसियाको जितमा मार्काे लिभाजा, मारियो पासालिस र निकोला भ्लासिसले समान एक गोल गरे । यही समूहको अर्काे खेलमा रसियाले माल्टालाई २–० ले पराजित गर्दा स्लोभाकियाले साइप्रसमाथि २–० कै जित निकालेको छ ।

यो नतिजा पछि क्रोएसिया ६ खेलबाट १३ अंक जोड्दै शीर्षस्थानमा रहँदा समान १ अंक नै रहेपनि रसिया दोस्रो स्थानमा रहेको छ । स्लोभाकियाको ९ तथा स्लोभेनियाको ७ अंक छ । माल्टा र साइप्रसको समान ४ अंक छ ।

[ad_2]

साभार

सम्बन्धित खवर