एजेन्सी – अष्ट्रेलियाको ब्रिसबेनले सन् २०३२ मा हुने ओलम्पिक तथा प्यारालिम्पिक खेल आयोजना गर्ने भएको छ । अन्तर्राष्ट्रिय ओलम्पिक कमिटिको बुधबार बसेको बैठकले ब्रिसबेनको नामलाई स्वीकृति दिएको हो ।

अष्ट्रेलियाले ओलम्पिक आयोजना गर्न लागेको यो तेस्रो अवसर हो । यसअघि सन् १९५६ मा मेलबर्न र सन् २००० मा सिड्नीले ओलम्पिक आयोजना गरेका थिए । सन् २०२४ को ओलम्पिक पेरिसले तथा सन् २०२८ मा अमेरिकाको लास एन्जेलसले आयोजना गर्ने यसअघि नै पक्का भइसकेको छ ।

‘यो ब्रिसेबन र क्विन्सल्यान्ड मात्र नभएर समग्र देशको लागि नै ऐतिहासिक दिन हो,’ अष्ट्रेलियाका प्रधानमन्त्री स्कट मोरिसनले भने, ‘ ओलम्पिक आयोजना गर्ने अवसर विश्वका ठूला सहरले मात्र पाउँछन् । यसले पनि ब्रिसेबन सहरको चिनारी विश्वमाझ पुग्नेछ ।’

ब्रिसबेनले ८४ प्रतिशत खेल स्थल अहिले नै उपलब्ध र अस्थायी संरचना प्रयोग गर्नेछ । मुख्य खेलस्थलको रुपमा गाबा क्रिकेट रंगशालालाई पुनर्निर्माण गरिनेछ । ओलम्पिक आयोजना गर्न इन्डोनेसिया, चीन, कतारको दोहा, हंगेरीको बुडापेस्ट र जर्मनीको रूह्र क्षेत्रले पनि दावी गरेका थिए । १५ सदस्यीय आइओसी कार्यसमितिले जुन महिनामा नै ब्रिसबेनको नाम प्रस्ताव गर्ने निर्णय गरेको थियो ।



साभार

सम्बन्धित खवर