काठमाडौं (हाम्रो खेलकुद) – न्युरोड टिम (एनआरटी) र सातदोबाटो युथ क्लबले फुटबल एकेडेमी चलाउनको लागि क्रमश: ल्याब्रेटोरी स्कुल, कीर्तिपुर र लिटिल एन्जल्र्स (एलए) स्कुल ललितपुरसँग सम्झौता गरेका छन् ।

क्लब, स्कुल र अखिल नेपाल फुटबल संघ (एन्फा) बीच बुधबार एन्फा कम्प्लेक्स सातदोबाटोमा एक विशेष कार्यक्रमको आयोजना गर्दै त्रिपक्षीय सम्झौता भएको हो । एनआरटीले ल्याब स्कुल र सातदोबाटोले एलए स्कुलसँग ६ वर्षको लागि सम्झौता गरेका हुन् ।

सम्झौता अनुसार पहिलो वर्ष १४ मध्ये ७ खेलाडी एकेडेमीमा प्रवेश गर्नेछन् । उनीहरुले स्कुलमा अध्ययन र प्रशिक्षण लिनेछन् । दोस्रो वर्ष क्लबले १४ खेलाडी उपलब्ध गराउनुपर्नेछ । त्यसपछि २१ खेलाडीले स्कुलमा अध्ययनसँगै प्रशिक्षण लिनेछन् ।

सातदोबाटो युथ क्लबका अध्यक्ष कपिल रानामगर र एलएका प्रिन्सिपल मुकुन्दराज शर्माले सम्झौतामा हस्ताक्षर गरे । सम्झौतासँगै एकेडेमी एलएएस–सातदोबाटो युथ एकेडेमीको नामबाट सञ्चालन हुनेछ । सातदोबाटोले शीर्ष डिभिजनमा पुगेको पहिलो वर्ष नै युथ एकेडेमीका लागि स्कुलसँग सम्झौता गरेको हो ।

पाँच पटकको लिग च्याम्पियन एनआरटीका अध्यक्ष सुन्दर जोशी र ल्याब स्कुलका प्रिन्सिपल लाक्पा शेर्पाले सम्झौतामा हस्ताक्षर गरे । एकेडेमी ल्याब्रेटोरी एनआरटी युथ एकेडेमीको नाममा सञ्चालन हुनेछ ।

एन्फाको तर्फबाट एन्फाका उपाध्यक्ष र ग्रासरुट्स र युथ संयोजक उपेन्द्रमान सिंहले सम्झौतामा हस्ताक्षर गरे । यसअघि संकटा क्लबले नेक्सस स्कुलसँग एकेडेमी सञ्चालनका लागि सम्झौता गरिसकेका छन् ।



साभार

सम्बन्धित खवर