एजेन्सी – ह्यारी केनले दुई गोल गरेपछि इंग्लिस प्रिमियर लिगमा टोटेनहम हटस्पर हारबाट जोगिएको छ । टोटेनहमले घरेलु टोली एभर्टनसँग २–२ गोलको बराबरी खेल्दै अंक खोस्न सफल भएको हो ।

एभर्टनका लागि दुवै गोल गिल्फी सिगुर्डसनले गरेपनि जित निकाल्न सकेन । सुरुवातमा अग्रता लिएपनि त्यसलाई जोगाउन नसक्दा टोटेनहम २–१ ले पछि परेको थियो । तर, केनले गोल गर्दै टोटेनहमलाई हारबाट जोगाए ।

गुडिसन पार्कमा शुक्रबार राति भएको रोमाञ्चक र प्रतिस्पर्धात्मक खेलको २७औं मिनेटमा ह्यारी केनको गोलबाट टोटेनहमले १–० को अग्रता लिएको थियो । उनले डिफेन्डर माइकल किनको गल्तीको फाइदा उठाउदै वान टचमा फिनिस गरेका थिए ।

तर, टोटेनहमको त्यो अग्रता लामो समय टिकेन । ३१औं मिनेटमा गिल्फी सिगुर्डसनले पेनाल्टीमार्फत गोल गर्दै खेललाई १–१ गोलको बराबरीमा ल्याए । सर्जियो रिगुइलनले पेनाल्टी बक्समा हामेस रोड्रिग्वेजलाई फल गरेपछि एभर्टनले पेनाल्टी पाएको थियो । जसमा सिगुर्डसन चुकेनन् ।

३८औं मिनेटमा सिगुर्डसनको प्रहारलाई टोटेनहमका गोलरक्षक तथा कप्तान ह्युगो लोरिसले बचाए । पहिलो हाफको इन्ज्युरी समयको थप गरिएको पहिलो मिनेटमा हामेस रोड्रिग्वेजको पासमा विन गुड फ्रेको बाउन्स हेडर आकासियो ।

५७औं मिनेटमा ह्युङ मिन सनको कर्नरमा टोवी एल्डरवेइरेल्डको हेडर पोस्टमा लागेर बाहिरिदा टोटेनहम बराबरीबाट चुक्यो । ६०औं मिनेटमा एलानले गोल गरेपनि उनको गोलले मान्यता पाएन । ६२औं मिनेटमा गिल्फी सिगुर्डसनले व्यक्तिगत दोस्रो तथा टोलीका लागि दोस्रो गोल गर्दै एभर्टनलाई २–१ को अग्रता दिलाए । उनले सिमस कोलेमनको पासलाई सदुपयोग गरेका थिए ।

६८औं मिनेटमा केनले व्यक्तिगत दोस्रो तथा टोलीका लागि दोस्रो गोल गर्दै खेललाई २–२ गोलको बराबरीमा ल्याए । ७२औं मिनेटमा केन ह्याट्रिकबाट चुके । ८५औं मिनेटमा हामेस रोड्रिग्वेजले सुवर्ण अवसर खेर फाल्दा एभर्टन जितबाट बञ्चित बन्यो ।

यो बराबरीसँगै टोटेनहम ३२ खेलबाट ५० अंक जोडेर सातौ स्थानमा रहँदा एक खेल कम खेलेको एभर्टन ४९ अंक जोडेर आठौं स्थानमा रहेको छ ।

ad



साभार

सम्बन्धित खवर